ភ្នំពេញ៖ អគ្គនាយកដ្ឋានពន្ធដារបានដាក់ឱ្យអនុវត្តមុខងារស្នើសុំឥណទានពន្ធក្នុងប្រព័ន្ធគ្រប់គ្រងការស្នើសុំចៀសវាងការយកពន្ធត្រួតគ្នាតាមអនឡាញ ដើម្បីសម្រួលដល់ការស្នើសុំ ព្រមទាំងធានាប្រសិទ្ធភាព តម្លាភាព និងគណនេយ្យភាពផងដែរ។

ក្នុងសេចក្ដីណែនាំចុះថ្ងៃទី១៩ ខែធ្នូ ឆ្នាំ២០២២ អគ្គនាយកពន្ធដារ លោក គង់ វិបុល បានលើកឡើងថាអ្នកដែលចង់ស្នើសុំឥណទានពន្ធនេះត្រូវមានគណនីនៅក្នុងប្រព័ន្ធអេឡិចត្រូវរបស់អគ្គនាយកដ្ឋានជាមុនសិន ដោយចូលទៅបំពេញក្នុង www.tax.gov.kh/km/e-service​​ ។ លោក គង់ វិបុល បន្ថែមថាចំពោះការស្នើសុំឥណពន្ធ អ្នកប្រើប្រាស់ចូលក្នុងគេហទំព័រដដែល ចូលក្នុងគណនីប្រើប្រាស់របស់អ្នក និងជ្រើសរើសប្រព័ន្ធគ្រប់គ្រងការស្នើសុំចៀសវាងការយកពន្ធត្រួតគ្នា បន្ទាប់មកជ្រើសរើសប៊ូតុង ស្នើសុំឥណទានពន្ធ និងបំពេញព័ត៌មានសម្រាប់ការដាក់ពាក្យ។

បន្ទាប់ពីដាក់ពាក្យស្នើសុំរួច អ្នកស្នើត្រូវស្នើសុំដោយភ្ជាប់ជាំមួយឯកសារតម្រូវគាំទ្រនានា មកកានអគ្គនាយកដ្ឋាន មុននឹងទទួលបានការឆ្លើយតបជូនដំណឹងពីការបញ្ជាក់ឥណទានពន្ធ៕